Song 4 | HUI | STEP | I̱naga yamali-o í̠ hulu wandari bayaore bedegoni. Í̠naga dengui labolabome buyi howa bo bidegonigoyu í̠naga de gili bidagome í̠na i̱ gubalini kego walia hara. Í̠naga mandari libilabu lama nogo memeru tidi yalu turu howa mali lima Gileada hari bare emene ngarunaga daliradagua biarua.

Song of Solomon 4

Igirime iba gana lalu ladai binigo ogo

1 I̱naga yamali-o í̠ hulu wandari bayaore bedegoni.
Í̠naga dengui labolabome buyi howa bo bidegonigoyu
í̠naga de gili bidagome í̠na i̱ gubalini kego walia hara.
Í̠naga mandari libilabu lama nogo memeru tidi yalu turu howa mali lima
Gileada hari bare emene ngarunaga daliradagua biarua.
2 Í̠naga neru nogo sibi karunaga irini áyu dege podowa wayawaya bini peleore hagadagua í̠naga ne peweleda.
Í̠naga ne mbira honda nabi bibahende bayaleore tigabi dege hai harua.
3 Í̠naga ne hambu daramabiore aga daramabi ngaligobida.
Í̠na bi laregola ne hambu moheoreda.
Labolabome í̠naga dengui buyi kegoyu i̱na í̠naga wanakui honani ale hendedo.
4 Wai pabeni Debidinaga mamage haga anda lu kagobi í̠naga ma lu bayaleoreda.
Í̠naga mani gurubu gele bayaore ngeru
ami agalinaga humbi dewaore anda lu biago háini girigerelo wiradagua biarua.
5 Í̠naga andu kira keru nogo dia wangabe labo laboli hono winigo baya taraore
palawaya karu dombeneha tani nalu haradagua biarua.
6 I̱na hari hombeneni mbiraleinisenesi ngabi maru buwi ngagoria pu holebero.
I̱na hari hombene ogoriani pu koore dege
ni anda pialu dagare bilo holebero.
7 I̱naga yamali-o í̠ baya taraoreda.
Í̠naga tinginini motudu mbira nawi baya taraore bedegoni.

8 I̱ one-o iyame Lebanono hari ngaruni yu wahalu mbaliyago iya haru mbaibu.
I̱na Hari Amanabi Seniribi Hemonobi uruninaga nenegoria howa daliape habe.
Hari uruniha budi gabua timbuni mini laionorubi lebadirubi haga ka.
9 I̱ one i̱naga yamaliore bedegoni.
Í̠na i̱ emene hangu handaya harigome i̱naga yamali mo ko harua.
I̱na í̠naga mani gurubu gele ngeru de hondowa i̱ homalu dai bidogoni.
10 I̱naga yamali i̱ one-o í̠na i̱ gubalini hariligonaga i̱ turuore ho kogoni.
Waini iba dende biaganego bagi hene lowa í̠naga gubalini holene ogoni baya taraoreya.
Pauda nga biagane tara tara ngaru bagi hene lowa í̠naga tinginini sanda ha̱i̱ harigoni nga taraore bida.
11 I̱ one bayale-o í̠na bi laregoni mone ibane dende biagadagua i̱na hale harogola dendebioreda.
Í̠na bi laregonibi dendebi nogo memenaga andu iba aleda.
Í̠naga aga bideru baya ngabi Lebanononaga iraru ngabi ale bida.

12 I̱ yamali-o í̠ mabu gama mbira wia do henego ale bedego
agali mbirame ge haanda habe nahe pabe bu yaanda hene wiaganegobi bede.
Mabuha iba duguaragola mbirali ibu hangu iba hambiaganego ale í̠ bede.
13 Mabu ogoniha ira bayale bayaleru andaho haganegobi í̠ bedegoni.
Ira marume lini baya dendebi noleneru daga.
Marume sanda bayale wabulene dalu
marume tomo mo dendebia holenebi daga.
Ira marume yári tara tarabi dalu
marume hagua ngabilo delolenebi daga.
15 Iba duguaraga halu poragome mabu mo bayale hagagobi í̠ bede.
Iba emeneru Lebanono hari ngagoha howa mabu ogoniha dugu dalidali biagagobi bede.

Wandarime iba gana lenego ogo

16 Puyabu uyu ibirago leneha howa eberego í̠ heyabe.
Puyabu unu leneha howa eberego í̠na i̱naga mabuha pulo yalu ibuwa
nga biaganeme to̱lotagi hela.
I̱naga yamali ibu ibuninaga mabuha ibalu
ira lini bayale dedaru do nela.